Uzabeshye
Abahinde!
Sinzi
uko inzoga iryoha, ariko sinabuza
abanywa kwinywera; bapfa kutarenza urugero. Iby'uburaya
simbishyigikiye,
sinabuza ababyemeranijeho kubikora; bapfa kwikingira. Ibya demokarasi
simbyanze, ariko sinagira Kagame inama yo kureka ingoma yaramvuriwe
n'abidishyi
be; apfa gusa kutabeshya ko ntayo akeneye. Iby'Imana simbizi, ariko
sinabuza
abasenga kwisengera; bapfa kutansakuriza banyemeza ko jenoside yatewe
na
Satani. Iby'amahirwe simbihakana, kandi sinabuza abatombola kubikora;
ariko
ubukire n'ubukene hari ahandi bushingiye hatari ku mahirwe cg umwaku
wavukanye!
Niba
udakozwa ibyo gutekereza cg ukaba
wifitemo ubutagondwa ubwo ari bwo bwose, ikomereze. Simpamya ko iyi
nyandiko
yagira icyo ikumarira. Ariko niba wumva nta kibazo, iyi nyandiko
izakugirira
akamaro; kandi uzambwira.
Mbese
hari umuntu n'umwe kuri iyi si wakwemeza ko aho atuye ubu ari ho
n'abakurambere
bose babaye kuva kera? Wakura he ibimenyetso se? Adamu na Eva ntibari
batuye i
Gasabo, kandi ntiwakwemeza ko iyo nguge wakomotseho yari mu mpinga
y'aho utuye!
Ese
ubundi bibaye ari na byo, ibyo byaguha uburenganzira bwo kwiharira
ubutaka
n'ibiriho byose? Barumuna bawe se? Amatungo se? Inyoni se zo?
Iyaba
wari uzi ko imbeba, inshishi, n'udukoko utabona twahatanze uwo wese
wiyita umusangwabutaka!
Erega n'ubundi ikibazo si ubu butaka dukandagiraho; ikibazo ni ubwo
tugendana
mu mutwe.
Wari
uzi ko hari abantu kuri iyi si babayeho neza kandi uretse na metero
imwe
y'ubutaka, batagira n'ubwenegihugu? Iyo ugabanije igitaka kikuri mu
mutwe,
amaso arafunguka; ukabona ibigukikije utari uzi ko bibaho kandi
wabinyuragaho
buri munsi. Ni bwo ibiteramwaku wirindaga (nk'ibirunga kera) bihinduka
isoko
y'amahirwe adakama (nk'ingagi ubu).
Ubanza
atari ubwa mbere wumvise urugero rw'Abanyekongo bagurana igihugu
n'Abayapani.
N'iyo buri Munyekongo yatwara iby'ashoboye byose agashyiraho
n'abamutwaza mu
makamyo, naho Umuyapani akazana akavalisi karimo utw'ibanze gusa, nyuma
y'imyaka nk'ibiri gusa ibintu byaba bimaze kwisobanura.
Mbese
Toyota, Mitsubishi, Sony n'ibindi byaba bikiri iyo hirya y'Ubushinwa cg
byaba
byaratwegereye? Mbese aho ntiwasanga Abamayimayi, Rayiya Mutomboki, na
M23
zimukiye Osaka, Tokyo, na Nagoya?
Byaba
bitewe n'iki? Bamwe baba birirwa babyaza ubutaka umusaruro, naho abandi
bazengerezwa na cya gitaka cyo mu mutwe!
Icyakora
umbabarire niba uru rugero rukubangamiye. Sinazinduwe
no kugira abo nsesereza rwose! Icyo
ngamije ni ukugira ngo dusase inzobe nk'imfura, dutarame nk'intore,
tujye inama
nk'abica inopfu.
Buriya
iyo ubonye iby'Abanyarwanda birirwamo
ku maradiyo, ku mbuga za enterinete no ku "mashyiga" wumva iki? Uzi
ko wagira ngo uwaturoze ntiyakarabye koko?
Mu
by'ukuri ni nde wungukira mu gihombo
cy'undi?
Ikibazo
cyabanje kuba Kalinga. Ivuyeho kiba
umwami. Avuyeho kiba Inyenzi. Zivuyeho kiba i Nduga. Ivuyeho kiba
Urukiga.
Hazamo Inkotanyi. Zivumbukana Muvoma. Ivumbura umututsi. Atsibukana
ikinani. Kisasira
ibihumbi amagana. Bamagana Kagame ...!
Mbese
ubu Kagame avuyeho, ikibazo cyaba
kirangiye ra? Hakurikiraho iki koko? Mama se demokarasi yahita iva ku
mpapuro
no kuri enterinete ikaboneza no mu Rugwiro ngo ba? Yaca he ko imipaka
yaba
ifunze? Ese ubundi ininjiye yakwicara he kandi iya FPR yaba yiyicariye
ku ntebe
yayo imazeho imyaka mirongo?
Ese
ubundi iyo demokarasi igomba kuzanana na
nyirayo aho napfa ntibazajyana! Kuki utayohereza mu ibahasha,
ukayitegera
indege cg ukayipakiza ubwato ukayohereza i Kigali niba ikeneweyo ko
yakakiranwa
amaboko yombi nk'izivuye Dubai ra?
Ariko
se kandi iyi demokarasi ibihira bamwe mu
bayitetse, bakayisiga igabuye, ikabakurikira n'iyo babunze ngo bakunde
bayirye,
... aho iyo demokarasi yo ni amahoro? Ko numva ngo n'abayihata,
abayironga
n'abayicanira ngo ubanza hari imigenzo n'imiziririzo bagira ra?
Sinamenya ariko
ngo ubanza iyo demokarasi yitungirwa n'impundu, ikazirana cyane
n'icyitwa
induru kabone n'iyo yaba ari itabariza ugiye kunogoka!
Nyamara
Byumvuhore yayamanye mbere, kandi
ubanza ari yo Mutagatifu Sipiriyani
Rugamba yatuburiye ngo tuyime amayira.
Iyo
ihaze ntikoma. Ntiyumva. Ntivuga. Ariko
iyo irimo ubusa, n'amasandi araceceka.
Adaceceka
se, yavugana "indya" mu
kanwa kandi yararezwe? Umuntu warezwe nka Bamporiki, akagorora ikoti
nka
Makuza, akagororerwa ubutahira nka Rucagu, urumva yavuga ataramira (nka
Gitera)
kandi iyo ari ubuheta muri kirazira batozwa bakinjira itorero?
Wamubeshyera
ibindi, icyo kiranyagisha.
Kandi
koko ikimene Banyaga na we yari uwacu!
Ariko nk'ubu biterwa n'iki ngo mu bize habemo injiji? No mu Bihayemungu
nka
Musenyeri Kalase (Classe) koko bemeze ngo umututsi si uw'i Rwanda?
Icyakora
nubyumva imvo n'imvano, ubanza uza
kubabariramo bamwe; burya benshi muri bo ntibashakaga kuzavugwa nabi
imyaka
magana. Nyamara wasanga impamvu ingana ururo koko!
Twateruye
tuvuga ko ntawahamya gakondo ye. Icyateye
umutware Bwanakweri kubuza benewabo kwica Gitera warwanaga ku bishahu
bya ba
sekuru, ni uko icyabiteraga cyaturukaga ku murage umuturage wo hasi
atapfa
gupfundura.
Uwapfunduye
u Rwanda ntawe umuzi. Ikidashidikanywaho,
ni uko Umunyiginya yigaruriye ingoma z'abahutu akoresheje umuheto. Niba
na
n'ubu u Burusiya bushobora kwigarurira intara ya Kirimeya (Crimea) isi
yose
igaceceka, ni irihe kosa Ruganzu Bwimba yakoze ubwo? Kandi niba na
Ruganzu
Ndori ari Umuha wiyanduriye u Rwanda Abanyoro barumazemo imyaka cumi
irenga,
ibyo ni ubutwari bakwiye gushimirwa ubu. Ndetse niba na
Rwabugiri
yaraciriyeho iteka abahutu ngo bajye bakorera abatutsi nta gihembo kuko
bari
bananiwe ikigeragezo yari yabahaye, ibyo ni nk'uko na n'ubu
tukirwana
n'umuvumo Eva yadukururiye kandi twe turengana.
Abandi
barengana burya ni abazungu, Abadage n'Ababiligi. Muri iyo myaka, no
muri
Amerika hamwe hari hakiri abacakara, abagore badakopfora i Burayi,
umwirabura
afatwa nk'imbwa muri Afurika y'Epfo (Mandela akiri incuke).
Ndetse
na bariya Bagaragu Bakuru b'Umwami (bigaramye Gitera na bagenzi be)
ngera aho
nkabumva, kuko bashingiye ku mateka gakondo kandi yahawe
umugisha
n'abanyabwenge ndetse n'abakozi b'Imana.
Mutara
na we ntiyari kunyuranya n'Ingangurarugo ze, n'ubwo yari Umukirisitu
kandi
akaba yari yarizeho. Ubanza yaranabonye bimuyobeye akemera kuba
umutabazi ngo
hime Kigeri ushobokanye n'imirwano.
Ikibazo
si amakosa yakozwe na kanaka igihe runaka; keretse niba dushaka
gusubiza ibihe
inyuma! Mbese Abanyafurikayepfo bababaye buke? Iyo bafunga amagereza
ntiyari
kuzura? Nonese ubu kuba batarahannye bose cg ngo bahoze abazungu ku
nkeke
byatumye irondakoko rikomeza?
Kuki
duhora dushimagiza ubutwari bwa Mandela, Gandi, na Maritini Luteri
Kingi ariko
ntitubigireho?
Inda
nini. Inda yo mutwe ariko--atari iya byeri n'imyungu!
Ubuhutu
butakirika, habonetsemo Abanyenduga n'Abakiga. Ubukiga butakirika,
habonekamo
Abashiru n'Abagoyi. Ubututsi butakirika, habonetsemo Abasajya n'abandi
bose.
Ubusajya butakirika, habonetsemo Abanyiginya n'Abega.
Iyo nsomye
ibitekerezo (comments/commentaires), icya mbere nibaza ni icyakorwa ngo
Umunyarwanda (an average Rwandan/un rwandais typique) agire imyumvire
iha
mugenzi we uburenganzira bwo kubaho nibura.
Uzi ko
bibaye bishoboka gukora uru Rwanda rusa neza nk'uru noneho ugaha buri
ruhande u
Rwanda rwarwo, wasanga ikibazo kikiri cya kindi cyo kubona bariya
bakiriho?
Iyaba
ikibazo ari demokarasi, uhawe amahirwe yakora iyo bwabaga
akayishyiraho. Iyaba
ari n'inda nini, uwahawe umwanya yajya yinumira agapakiramo nka
Bazivamo,
Rwarakabije, Harelimana, Uwizeyimana, Rwigema, n'abandi.
Impamvu
nagusabye kuzabeshya Abahinde rero, ni uko benshi
batazi
inshoberamahanga z'Ikinyarwanda. Ikindi ni uko bo bibera muri bizinesi
ibya
politiku ntibibacire ishati.
Abanyarwanda
benshi bafite ikibazo cy'ubukene ku buryo n'iyo wababeshya kera
amaherezo
bazakuvumbura. Uramuha ibigori n'ikigage aguhe amashyi. Umuhe
inka
agusumbye Imara Rurema. Ariko numufatira mitiwele rimwe, azakuvumira ku
gahera.
Ibyo
ariko ntibizamubuza kukwita igitangaza no kwikorera agaseke karimo
n'ibyo atazi
iyo biva n'iyo bijya, kuko nta kindi yishyingikirijeho. Ni
wowe atezeho amakiriro. Nonese yakuvaho
akajya he?
Yajya
he se koko? Ko yakurengeje Imana ye,
akaba atakiriho mu by'ukuri, yakuvaho akagana he?
Ariko
hari ikintu kijya kintera impungenge
cyane. Iyo Meya yasuye abantu, bamubyinira nk'umutware bakesha
kuramuka; iyo
Perezida ahageze, bamushimira no kuba imvura yaguye; bwacya bakajya mu
nsengero
kuramya usumba byose!
Ikibazo:
ni nde ukubeshejeho koko?
Niba
uri umwana muto, umurwayi, ufite ubumuga buhanitse cg impunzi,
birumvikana ko
hari abo ukesha amafu n'amafunguro. Ariko niba wishakashakira ifunguro,
imyambaro, mitiweli, ubukode n'ibindi, ubwo ni wowe wibeshejeho. Si
Meya; si
Perezida; si Imana (dore ko yo ivubira ababi n'abeza)!
Meya
abeshejeho abe, nk'uko mwarimu abeshejeho abe, n'umufundi akabeshaho
abe. Ni
umukozi nk'abandi. Keretse niba uri uwo kwa Meya! Perezida we, ahubwo
abe
babeshejweho nawe! Hejuru y'umushahara agenerwa buri kwezi,
abana be
n'abakozi be babeshwaho n'imisoro yawe--niba utanga umusoro
birumvikana.
Umushahara we ntajya awukoraho ngo arishyura inzu cg ngo arahaha.
Iyo
yagusuye, uhagarika imirimo yawe, ugahomba umubyizi niba udahembwa ku
kwezi.
We, ahabwa itike, misiyo, n'insimburamubyizi. Maze ukirirwa umutaka,
witakuma
ku zuba rikaze cg mu mvura idacya, ugataha n'amaguru, ugatahana icyaka,
ukangata ngo uri intore!
Unyumve
neza sinkukangurira kwigomeka kuko itegeko rigutegeka kubahiriza
ubuyobozi.
Sinakubuza gukora ngo uragira uwo uhima, kuko unabigeregeje ari wowe
wabihomberamo mbere y'abandi bose. Wibuke ko uri umwe rutoki. Niwanga
kugendana
n'umuvumba, uzavira mu nzira amamiliyoni yigendere!
Ariko
aya mamiliyoni ntazarihira umwana wawe ishuri, ngo amuvuze, ngo
abagaburire. Ni
yo mpamvu ukwiye kureba ibikureba.
Umunsi
umwe nkitangira ishuri umuminisitiri yaje gutaha umuyoboro w'amazi mu
gace
k'iwacu. Sinibuka amagambo yahavugiwe, ariko na n'ubu ayo mazi
arakitilirwa uwo
muminisitiri--nyuma y'imyaka hafi 40. Kandi mu ndirimbo twaririmbye
icyo gihe,
twasingizaga Minisitiri w'Umutungo, Muvoma, Imana. Ubwo
Kinani we yabaga ari we utuma ingumba zibyara,
abana bakonka, imyaka ikarumbuka!
Ayo
mazi, ayo mashanyarazi, iyo mihanda
n'ibindi babitanga babikuye he?
Yego
iyo bije biba ari byiza kuko byashoboraga
no kuzimirira mu mifuka yabo, ariko ingaruka ni mbi cyane mu gihe
kirekire.
Birogoya igenamigambi ry'uturere n'iry'igihugu muri rusange,
bikadindiza
ubuvuzi n'uburezi bagenda bapfurapfuraho gahoro gahoro ngo
ntibyihutirwa. Ariko
by'umwihariko, uku kutagira gahunda bikwangiza mu mutwe, ugahora
utegereje
kugirirwa ubuntu.
Ibyo
kuboneza urubyaro ntubikozwe;
kwiteganyiriza cg kuzigama oya; ibyo gukora gahunda y'umwaka utaha
ashwi;
imihigo y'urugo no mu kazi ukabikora ari nko kurangiza umuhango.
Byakuyobera
ukirukira mu rusengero kwicuza
icyaha cyo kuba waratwawe n'iby'isi cg wihugiyeho cyane. Maze
ukahahurira
n'abatekamutwe bazobereye mu bujura bwitwaje Imana, bakaguhanurira,
ugahahamuka; n'utwo wari usigaje ukaducurira mu kebo (agaseke) batajya
bibagirwa kukutega! Bati "Gahunda
ni iy'Uwiteka," kandi bakagusaba kwitanga ngo hubakwe
urusengero
rukomeye.
Urusengero
rukomeye rw'iki se kandi Yesu agiye
kugaruka kutwijyanira aheza?
Mu
rukerera bakagutumira mu nama ngo uzinduke
ujya gukomera amashyi abashyitsi baje kwizihiza umunsi w'umurimo--undi
mubyizi
ukaba uragiye da!
Kutagira
gahunda ni cyo gihejeje benshi mu
bukene. Ni gute wakubaka itaje nta gahunda?
Najyaga
mbaza abanyeshuri banjye (muri
kaminuza) icy'ibanze mu kubaka inzu.
Bamwe
bakavuga ubushobozi, abandi ngo imbata
y'inzu (plan cadastral), abandi ngo dovi (devis), bamwe ngo byose
ntibyakorwa
nta butaka.
Ibi
byose ni ingenzi. Ariko icy'ibanze ni icyo
iyo nzu izakoreshwa (utility/purpose). Akamaro ni ko shingiro ry'ibyo
byose.
Hari
abubaka ahadashobotse ngo ni uko ari ho
bafite ikibanza cy'ubuntu cg gihendutse. Bugacya bakayisiga aho,
bakajya
gukodesha ahegereye akazi cg umugi. Hari abagera hagati bubaka,
bakibuka ko
bagomba gukuraho cg kongeraho ibi n'ibi. Hari n'abamara kuyitaha
igahita
isenywa cg bagategereza umwaka ngo babone umupangaji wa mbere.
Ngiki
igisobanuro cy'impamvu hari inzu zimara
imyaka amagana zigikoreshwa, izindi ntizimare kabiri.
Ariko
ikibabaje cyo kutagira gahunda
n'igenamigambi, ni uko utapfa wubatse itaje nyataje, ahubwo uhora
wangiza
umutungo n'ubutaka. N'iyo utaba ushoboye kubakira rimwe umubare
w'amataje,
ugomba kuba uzi umubare uteganijwe kugira ngo ukore umusingi
(foundation)
ukomeye ku buryo n'izindi zizajya zongerwaho nta kibazo.
Ubu
nandika ibi, umunyamakuru abajije
umuyobozi wa Komisiyo y'Amatora mu Rwanda umubare bateganya ko
uzatorera hanze
bakunze kwita diasipora (diaspora), ni ukuvuga kuri za ambasade
n'ahandi.
Umugabo ngo kubera amateka y'igihugu, nta mubare uzwi. Ni byo kuko
wamugani
bamenya abiyandikishije muri ambasade z'u Rwanda iyo. Ariko se nibura
ntibafite
ikigereranyo baheraho bakurikije imibare y'ubushize nibura, kugira ngo
bateganye imibare y'impapuro, ibikoresho n'abakozi bahagenera?
Niba
iyo mibare idahari, bisobanuye ko nta
mubare w'abatora uzwi. Ibyo bivuze ko imibare itangwa ikwiye gukemangwa
kandi
n'ingengo y'imari igenda ku matora na yo ubwo ni uko nyine. Ariko ibyo
kubibwira nyarucari wikenyereye yakereye gutora uwamuhaye inka
n'umutakano ni
ukumutera ikirungurira no kwitera igihe!
Atarigira
ikinani yatwigishaga kwizirika
umukanda, atuburira ko "nta ya bugufi yatugeza ku iterambere." Ibi ni
ukuri. Kandi n'ubwo aregwa byinshi, sindumva abamurega kwaya cg
kwigwizaho umutungo.
Igitugu
cyariho pe, na telefoni na mudasobwa
zigendanwa zari zitarahagera. Ariko imibare yatangwaga yabaga ifite
ishingiro.
Si ibi byo kuvuga ko ubwandu bwa Sida bumaze imyaka irenga icumi kuri
3%,
itamanuka cg ngo yiyongere--ngo abapfa bangana n'abandura da! Mbega
gakwenge
iregeye neza! [Kandi udukingirizo twaragabanutse, inda z'indaro
zikiyongera!]
Miliyoni ikavanwa mu bukene kandi umubare w'abagwingira ukiyongera!
Hafi ijana
ku ijana bakagaragaza ko bishimye kandi icya kabiri cyabo bafite
agahinda (depression).
Nyamara hari ibitajyana nk'amase n'amaganga!
Iterambere
si amazu, amamodoka, imihanda,
amashanyarazi, amazi, n'ibibuga. Uribuka rwa rugero rw'Abanyekongo
n'Abayapani?
Iterambere ribanziriza mu mutwe, rikabyara ibyo byose buhoro buhoro.
Nonese
iyihuse ntiyabyaye ibihumye?
Sinshyigikiye
abiba amabendera mu Rwanda cyane
cyane ko ntazi n'icyo yabamarira gifatika. Ariko hari akazamini kajya
gakoreshwa ngo bagenzure iterambere riri mu mutwe w'umuntu. Mfashe
agatambara
k'ubururu nkagashyira hejuru y'ak'umuhondo n'ak'icyatsi, narangiza
ngashyira
izuba ry'umuhondo muri ka gatambaro k'ubururu, ubwo naba ndi gukora
iki?
Ibendera ry'u Rwanda.
Nonese
utwo dutambaro nidodeye ndushyize ku
nzu cg imodoka yanjye hari ikibazo wagira? Mfashe umukasi se
nkaducagagura hari
ikibazo wagira? Byaterwa n'uwo uri we!
Yenda
wakihanganira kubona ako
"kabendera" ku nzu cg imodoka yanjye, ariko si benshi bakwihanganira
kumbona ntanyagura ako "kabendera" nidodeye. Ndetse unshoboye
wankurubana ukangeza ku bashinzwe gukosora inyangabirama!
Ngaho
aho abateye imbere bagaragarira rero.
Ntawabyitaho na busa; keretse mbaye ntanyaguje udutambaro tw'undi cg
ntujugunye
ahatabigenewe! Hagize n'ushaka kugira icyo ambaza, yaba ashaka kumenya
impamvu
ntishimye, n'icyo naba nshaka ko gikosorwa. Nta migeri! Nta raporo!
Birumvikana
ko uhise ugira akantu. Nonese ubwo
waba ukunda u Rwanda kandi uciye ibendera ryarwo ra? Wowe wabonye
naciye
ibendera ry'u Rwanda, kandi jye nzi ko naciye udutambaro niboheye!
Icyakora
koko icyo naciye gishushanya ibendera ry'u Rwanda. Ibyo se biguha
uburenganzira
bwo kungirira nabi? Ni iki kigutera kungirira nabi?
Ngo
ukunda igihugu? Kurusha Kayumba,
Rudasingwa, Mushayidi, Kabuye, Karegeya, Ruzibiza, Rujugiro, n'abandi?
Icyakora
uvuze ko ukunda amagara n'umugati
wawe nakumva. Wamugani hari uwabona ntacyo uvuze akagira ngo
turafatanije!
Mbese
ari utera igihugu ari n'umubuza
kwinjira, ukunda igihugu ni nde?
Liyoneli
Mesi (Lionel Messi), Umunyarijantine
(Argentina) kabuhariwe mu mupira w'amaguru ntajya aririmba indirimbo
yubahiriza
igihugu cye. Ari mu Rwanda ubanza yaba yaribagiranye kera! Mbese ni uko
abo
b'iyo badakunda igihugu cyabo? Wari uzi ko hafi icya kabiri
cy'Abanyamerika
ntibazi indirimbo yubahiriza igihugu cyabo? Kandi ntimwamarana iminota
ibiri
atakuratiye igihugu cye! Mwanatindana akakubwira icyo yangira perezida
we
adakebaguzwa.
Ikibazo
rero si Kagame, FPR, abazungu, FDLR,
Meya, abaturanyi cg Satani.
Ikibazo
ni wowe!
Ubu iyo uba warapfuye ntuba uri muri ibi byose.
Ariko n'ubundi urasa n'ugiye gupfa ahagaze!
Singutera
ubwoba; ahubwo ndagukebura. Va mu
matiku n'amanyanga, witeze imbere.
Ngo
akazi karabuze? Ubwo katabuze se ni ryari? Ngo isambu ntiyera? Naba
nawe
wabonye umunani; abawe bo bizagenda bite?
Nonese
Kagame navaho ni bwo uzakabona ra? Hazavuka andi masambu se?
Mbabajwe
cyane n'abana bawe wirirwa uririra cg uciragura mu maso ngo nta cyo
bakumariye.
Nonese wagiraga ngo bakumarire iki ra? Harya
ngo warababyaye, urabarera? Wabyaye nde-- Habyarimana? Wareze
nde--Harerimana?
Uratega iminsi nde--Hagenimana?
Na none
umbabarire niba ngusesereje. Si cyo cyanyirije aha. Nashakaga gusa
gusangira
nawe tumwe mu tubazo turi mu nzira y'ubuzima. Ariko sinarangiza
ntakugereye ku
cyakitwa umwanzuro wa byose twivurusemo.
Reka
mbanze ngushimire kuba wihanganye ugasoma, ukaba ugeze hafi ku musozo. Niba
utasimbutse, ushobora kuba uri mu
bashobora kugera ku cyo bashaka (winners). Ishimire kuba urengeje
urutambwe ba
Mbigenzente (losers) birirwa baganya, nta cyerekezo.
Inzika,
irondakoko, amatiku, amaganya,
n'umushiha ntaho bizakugeza pe! Kwiheba no guhebera urwaje na byo kandi
nta cyo
bizakumarira.
Va
mu kigari; waba uri i Kigali cg Burayi.
Waba uri mu bitwa abakire cg abakene. Waba uri mu bitwa abaturage cg
abayobozi.
Uti
"Jye kuva kera nirinda ibigari pe!
Uwiteka yarandinze sinajya mu bya politiki, kandi sinjya nshidukira
iby'amashyirahamwe n'udutsiko. Nta mana y'ibyiruka." Niba wumva wavuga
aya
magambo cg asa na yo, uri mu bigari nibura bibiri: icy'Imana, n'icya ba
Mbigenzente. Kandi byombi ntibikugirira neza, dore ko ntaho wagera
ubaye
wigumiye mu kigari icyo ari cyo cyose. Reka tubive imuzingo.
Kugendera
mu kigari ni byo mu cyongereza bita
"bandwagon thinking." Ni ukuvuga ko ujyamo, kikakujyana iyo ukiyoboye
yishakiye. [Ubitandukanye no kugendera muri bisi cg gariyamoshi, kuko
uba uzi
igihe winjiriye, iyo ujya n'igihe uza kuviramo.] Akenshi usanga urimo,
ndetse
benshi ntibanamenya ko bari mu kigari!
Mbese
ujya usengera ikipe yawe ngo itsinde?
Mbese ujya usaba imvura? Mbese wemera ko hari ibintu bitera umwaku cg
isangwe
(amahirwe)? Mbese wumva ko Abanyaburezile (Brazil) bavukana umupira
w'amaguru
mu maraso? Mbese wemera ko ari buve atakurara mu mubiri (ko impanuka cg
urupfu
bitirindwa)? Mbese wumva gupfa no gukira kwawe nta ruhare runini
ubifitemo?
Niba
hari na hamwe wasubije yego, uri mu
kigari nta kabuza.
Nonese
ko amakipe yombi aba asengera gutsinda,
ubwo Imana yakora iki koko? Mbese iyo usaba imvura kandi hari abasaba
umucyo
muturanye, ubwo Imana yasubiza nde? Uretse inkuru, ni nde wiryamiye
akabona
biramwizaniye? Nonese kuki twohereza abana ku ishuri niba babivukana
ra?
Ubuvuzi, amabwiriza n'amategeko (nk'ay'umuhanda) bimaze iki se ubwo?
Hanyuma se
ukaba wirirwa urwana n'iki niba ibyawe byararangiye koko?
Uretse
n'umwuga, burya n'ururimi ntiruvukanwa.
Byose birigwa cg bikiganwa. Ntibigwa nk'imvura, dore ko na yo burya
ahanini
ifitanye isano n'uko twita ku bidukikije. Si yo mpamvu se dutera ibiti?
Uzabyararike hose maze ujye mu rusengero urebe ko imvura igwa!
Kuva
mu kigari ni urugendo rurerure. Uretse
no kurusoza, abenshi ntibanashaka kurutangira. Bishimiye umunyengo
w'ikigari.
Kandi ni ko buri gitondo na buri mugoroba baba basunikiramo n'abana
n'inshuti
zabo zose!
Abadepite
baherutse kumvanamo kabisa. Ngo
musubizemo Imana mu itegekonshinga itazavuga ngo bangaraguza agati!
Maze n'abo
hanze baboneraho. Ngo ibyo ni ubuhakanyi bukabije. Ngo abadepite bamaze
kurengwa. Ngo ntituzaritora niba ari ibyo!
Umugoroba
umwe umugabo umwe ababaza niba
urubanza baburana ari urwabo cg ari ba mpuruyaha. Bose ngo ce! Ahubwo
abazi
ubwenge batangira kwisegura no gucurikiranya amagambo. Ubu nta
n'ugikopfora!
Ntumbaze niba abakozi b'Imana na bo barayiguranye umugati.
Mbega
ukuntu kuyobora abiganjemo abagendera mu
kigari ari umugoko! Umuntu arangiza kaminuza, akamara imyaka ku
buyobozi,
akazenguruka isi, ... atarasobanukirwa icyo itegekonshinga ari cyo
n'icyo
rigamije?
Iyo
Mana ishyirwaho none, igakurwaho ejo,
harya ubwo yakugeza he ra?
Itandukaniye
he na yayindi yirirwaga ahandi
igataha i Rwanda se maze bamara kumenya ibyayo bakigabiza igihugu ku
manywa
y'ihangu? Njya numva ko ngo hari n'abayiciye igico itahutse nimugoroba
bakayitsinda i Kinihira!
Kandi
koko ubanza abahungu barayihanuye naho
abadepite bakaba bakiri muri ayo! Nonese ko ari yo yashyiragaho
abayobozi none
ubu bakaba bashyirwaho n'amatora, tekinike, cg ruswa! Ubundi se ko
yaziranaga
n'ikinyoma, ubugambanyi n'ubwicanyi none bikaba byuzuye no mu nsengero!
Ko
naherutse ari yo itanga kubaho, inka n'umutekano none bikaba bitangwa
na
Kagame!
Burya
kwishimira ko Abanyarwanda benshi bemera
Imana ntibitandukanye no gushimagiza ubuhinzi ngo ni bwo butunze benshi
mu
gihugu. N'ubwo icyo uba ushaka kuvuga kiba ari cyiza, icyo uba uvuze
kiba ari
kibi cyane.
Ubwo
mperutse i Nayirobi, nagiranye akaganiro
gato na Bwana Atali Sha (Atal Shah), nyiri Nakumatt. Namubajije ibanga
yakoresheje ngo yubake bizinesi igizwe n'ibiduka (malls) birenga 50, mu
bihugu
bitanu kugeza ubwo. Yabanje kumbwira ko byose abikesha Imana, ariko
asoreza ku
muhate, kwihangana n'ibindi biranga abateye imbere.
Mu
baherwe cumi na bangahe twaganiriye, ni we
wenyine wibanze ku Mana nk'isoko y'ubukire bwabo.
Ngiri
ipfundo ry'ubukene i Rwanda rero. Uri
hasi, uwishoboye n'umuherwe bose basangira amaganya n'amanyanga, byose
mu izina
ry'Imana. Uwaminuje, uwize abiri n'utazi gusoma no kwandika bose
basangira
ibihuha, byose mu izina rya FPR. Umusivili, umusirikari n'uwihayimana
bose
basangira ubwoba, byose mu izina rya Kagame. Nonese abato bazarebera
kuri ba
nde, bazitabwaho na nde?
Yohana
Kayoga Yozefu Magufuli aherutse
gutungura abantu ashyiraho guverinoma nto, idahubukiwe, kandi mu
bipengeri.
Sinshidikanya ko ari agashya muri Afurika. Ariko ibi ni nk'icya gatatu
gusa
cy'ibikwiye gukorwa! Buri muminisitiri akwiye kubanza akigwaho na sena
mbere
y'uko perezida anatangaza izina rye. Ibi bisaba ko itora rya perezida
ryajya
riba nibura amezi abiri mbere y'uko manda irangira, kandi perezida
mushya
agashyiraho guverinoma ye indi igihari, niba ari ngombwa ko agira abo
ahindura.
Birumvikana
ko ibi bisaba abasenateri
bakamiritse, barikanuye kandi batayegayezwa. Si abahabwa manda ebyiri
gusa,
hanyuma bakajya gusimbiza abana ba perezida cg minisitiri
w'intebe ngo
bakunde bahabwe umugati!
Nonese
ni he wumvise binuba ngo umusenateri
amazeho imyaka myinshi? Uzi ko hari n'ibihugu bageza ku myaka mirongo
itanu muri
sena kubera ubushobozi bwabo? Abasenateri n'abacamanza ntibagombye
gucunaguzwa
cg gushyirwa mu gatebo kamwe n'ak'abaminisitiri, cg abandi bakozi
n'abanyapolitiki. Ni bo biru b'ingoma!
Ako
nasorezaho ni akantu gahora kantera
akantu. Ngo ntagoheka, yaragowe, ntashyira uturaso ku mubiri!
Ndemeranya
nawe uvuga ko kuyobora bitoroshye,
cyane cyane ko no kudoda inkweto cg kwigisha na byo bitoroshye. Ariko
harimo
amakabyankuru n'amaburankuru menshi.
Amakabyankuru
ni nko kuvuga ko ibyabaye byose
umuyobozi aba abizi. Amaburankuru ni nko kuba abantu bibwira ko iyo
umuyobozi
agize aho ajya buri gihe aba ari mu kazi, ku neza ya rubanda.
Aha
ni ho tugarutse kuri kwa kutagira gahunda
n'igenamigambi twavuze haruguru.
Ngo
iyo perezida w'Amerika amaze gutorwa bwa
mbere, hatangira byinshi mu guhindura imibereho ye. Telefoni na
mudasobwa
yakoreshaga bisimbuzwa ibindi bikoze ku buryo bumurinda guhangayika
(stress) no
kwinjirirwa (hackers).
Ariko
icyanyumije ni ukumva ko bamusigira
nimero za telefoni bashobora guhamagarana zitarenze eshanu! Ngo
umuryango we
wose uhabwa nimero imwe gusa, ubariyemo n'abana be bose! Ngo nta
muminisitiri
bahamagarana kuri telefoni ye uretse uw'ububanyi n'amahanga.
Birumvikana ko
atakifata ngo agire umuperezida cg undi muntu uwo ari we wese bavugana
adaciye
mu nzira yagenewe. Kandi nta muntu n'umwe babonana atari kuri gahunda
y'umunsi,
harimo n'umuryango we. Ngibi ibituma bo batora agatotsi; ari na yo
mpamvu
bakunze kudahubuka mu byemezo bafata n'ibyo bavuga.
N'ubwo
hatabuzemo amakabyankuru, burya abavuga
ko Papa atajya yibeshya baba bafite icyo bashingiyeho kitari ubutatu
butagatifu. Ibyemezo byabo bituruka kure, bigatekwa igihe, kugira ngo
bizarambe. Iyo ubasabye ikintu cg ubanenze, barabanza bakakwifuriza
amahoro ya
Kirisitu; bagasoma Bibiliya; bakajya mu mategeko; bakitegereza
politiki;
bagateranya; bakagabanya; bagakuramo; bagakuba; bakaguha igisigaye. Iyo
nta
gisigaye [kandi akenshi iyo mibare iguha zeru cg rimwe gusa],
barakwihorera;
bakinumira; mugacengana; bakagutega ikirago cg inkoramutima yawe
ikagushugurikira.
Mbere
yo gusubiza Umunyamerika ngo Ruzuveliti
(Roosevelt) na we yarambye ku butegetsi, ukwiye kubanza kumenya uko
byagenze
n'icyabiteye. Ntiyigeze atanga umukoro wo gukemura ikibazo cya manda cg
ngo
amamiliyoni bikorere uduseke bajye mu nteko gucinya akadiho. N'ubwo
bari bari
mu ntambara ya kabiri y'isi yose ku buryo bitashobokeye benshi
guhangana na we,
itegekonshinga ryarabimwemereraga 100%. Kandi ntiyari yarasezeranije
abantu ko
nta yindi manda azafata.
Ariko
dukomye n'ingasire, hari ubwo mbona
ntarenganya Kagame, Museveni cg Mugabe!
Ubutegetsi
wabugezeho uburuhiye, ubwambuye
abashoboraga kuguhitana. Amahanga aragushyigikira, abahanga baragutaka,
uduhanga turagushimira, n'abamalayika barakuririmbira. Bati "Ni wowe
nta
wundi iteka ryose!" Ngo ni wowe wabitekinitse? Uramaze rwose. Bose iyo
babikora! Ngo babaye inyangamugayo, banga kumena amaraso, banga
gutekinika?
Ibyo se ni byo bibatera kwigira abagaragu n'abaja bawe?Nibemere rero
ibyo
ushaka bibagirirweho; Ndakuramutsa Mariya, wuje inema uhorana n'Imana,
...
Amina!
Izo
ni ingaruka zo kutagira inzego zikomeye
(strong institutions); kandi ibyo si ikosa rya perezida gusa. Twese
dufitemo
uruhare, uhereye kuri nyarucari ukageza kuri dogiteri usingiza Kagame
ngo ni we
wenyine uzi uko ayobora "sosiyete" ye. Ye?
Igihugu
se cyabaye bizinesi y'umuntu umwe
ryari? Biciye mu zihe nzira? Abantu bareba he?
Ubwo
tuvuze ibya bizinesi, reka ngere ku
ngaruka z'imiyoborere mibi. Uzi ko wagira ngo
i Kigali abarengeje
ubwangavu n'ubugimbi (adolescence) ni mbarwa! Ni gute ba nyir'amahoteli
ijana
birirwa baririra Leta ngo bagiye kubatereza cyamunara? Ngo amabanki
arabishyuza
kandi nta bakiriya bagira da!
Nonese
wumvaga bizagenda bite? Ngo Leta
yarabashutse mwubaka amahoteli? Aka ni akumiro nka ba bandi bireguzaga
muri
Gacaca ko bashutswe ngo barimbagure abaturanyi babo, babarire inka,
banatekeshe
amakumbo yari yubatse inzu zabo! Koko? Umuntu urengeje imyaka 18
ntiyari akwiye
kwatura ngo narashutswe. Ubanza ahari ari ikibazo cy'ururimi muba
mushaka
kuvuga ko mwashyutswe; kandi ntimuyobewe uko byagendekeye imbwa
yabigeregeje!
Si
mwe mwirirwa mwigisha ko Leta ari buri
wese? Nonese ko ari mwe mwishutse nyine ubwo muraririra nde? Mugume
hamwe rero
mwumve ingaruka z'ikinyoma. Icyakora simbasetse, kuko igihombo cyanyu
nanjye
kimfiteho ingaruka nyinshi cyane.
Amahoteli
ijana afite ibibazo, bivuze abakozi
nibura 3,000 bafite ibibazo, bivuze nibura abantu 10,000 bafite
ibibazo. Kandi
aho ni mu mahoteli gusa. Bite mu bindi bikorwa bidindira se?
Abandi
ngo erega si urw'umwe, ku isi hose
byarayoberanye. Gesa ubw'iwawe, ubw'abandi ubwihorere niba batagusabye
umuganda! Ibyinshi ubwirwa si ko biba bimeze burya. Kandi n'iyo byaba
byarayoberanye koko, jya wibuka ko Nakumatt itari mu bihombo; Simba
Supermarket
ntibyayiyobeye; Radio 1 ntimeze nka Contact FM; Volcano Express
irahinda!
Itegereze neza hafi yawe, mbere yo kwitera ijeki.
Igihe
kirageze ngo abantu bamenye ko igipindi
kigenda gicyura igihe; haba muri Leta, mu miryango
nterankunga, no mu
bikorera. Cyane cyane mu bikorera. Muri Leta n'imiryango, nta gihombo
kibaho ku
muntu. Barandika, bakaripotinga, bikarangira bityo. N'iyo bikoze ku
muntu,
ahanini arishyura, akabura akazi, cg agasimbuka. Bikarangirana n'igihe.
Rimwe
na rimwe aragororerwa ahubwo; wakopfora bakaguta ku munigo cg
bakaguhindura
umusazi--ugasaba imbabazi; Imana igahabwa icyubahiro. Aleluya!
Uwikorera
we si uko bigenda. Uhomba igishoro,
ugasigarana imyenda igenda yiyongera uko bukeye, ugashegeshwa n'ishavu
ryo
kubona ibyo waruhiye bihomboka ubireba. N'inshuti zawe zikakugendera
kure ngo
umwaku wawe utazikukiramo ga!
Ntitukitiranye
ibintu. Ikibazo cy'ubukungu
giherutse kuvugwa ku isi ntabwo cyaturutse kuri Leta zashutse abantu
bazo cg
abikorera bishinze Leta ngo zizabashakira abakiriya. Ahubwo nka Leta
y'Amerika
ikivumbura ko amabanki yari atangiye kugirana ibibazo n'abikorera,
yahise
yinjira muri icyo kibazo ntaho ibogamiye. Byarangiye inganda z'iwabo
zivudukana
iz'abanyamahanga, ku buryo nka Toyota yo mu Buyapani itakiri hejuru
General
Motors.
Nta
gipindi kandi. Wari uzi ko Leta ya Obama
yemeye ikajya kuguza iy'u Bushinwa tiriyari eshatu z'amadolari
(U$3,000,000,000,000) ngo ihangane n'icyo kibazo? Abo bahanganye
bamushinjaga
kwandagaza ishema ry'igihugu, ariko yaberetse ko iyo imibare yavuze
politiki
yegama.
Icyo
ariko si cyo kibazo kiri i Kigali! Leta
n'abikorera baritana bamwana, kuko usanga byose babivangavanga.
Wamugani,
ugomba gutunga Leta kuko ari wowe, kandi ntiwayitunga urutoki kuko ari
wowe
waba urwitunze. Bene amatwi, nimwumve icyo umwigisha abwira amatorero.
Amina!
Gusenya
ukubaka ibijyanye na viziyo si bibi. Ariko menya ibyo ugiye gukora,
impamvu
zabyo, inyungu zabyo, n'ingaruka zabyo. Ese ubundi viziyo ni amazu asa
neza
n'imihanda ikubuye gusa? Ngo wishinga iy'undi, iyawe ikarangara!
Ugomba
guhindura imiyoborere ya bizinesi yawe
ukimara kumva iri tangazo. Sigaho gukangisha abakozi bawe kubirukana,
kuko
bituma bakorana igihunga, abakiriya bawe bakaba ari bo babihomberamo.
Gabanya
inama zihoraho kandi zitarangira wirirwa wivovoteramo, uharanga buri
wese,
ukangata. Gabanya ibyemezo ucisha mu matangazo, ahubwo wongere uruhare
abakozi
bawe bagira mu gufata ibyemezo. Reka kurobanura ku butoni, ngo bamwe
ubongere
imiheha yo kuvuna, naho abandi ubaryoze n'uwo bavunnye batabishaka.
Gira
gahunda mu mikorere yawe kandi ushishikarize buri wese kugira
igenamigambi ku
kazi no mu ngo zabo. Tangira kubiba umuco wo gutozanya (mentoring
&
coaching) ku kazi, kugira ngo umwanya ubonetse ubone uwujyamo vuba
kandi
abikwiriye. Shima uwabaye indashyikirwa uwo ari we wese, ariko wirinde
biriya
byo kubasaba ngo bitoremo ababaruta. Irukana uwananiranye, ukurikije
amategeko
agenga umurimo.
Ngo
urumva ibyo utabivamo? Si yo mpamvu se
nyine bagomba kugutereza cyamunara cg ugahora mu maganya? Cyono va muri
bizinesi rero inzira zikigendwa. Aho wenda Leta izakugirira impuhwe
nubasha
kurira neza mama shenge! Ak'ijisho!
Kubaka
sisiteme (system) si ugukina; si
amahirwe; si agahato; si huti huti. Inkono se ko ihira ikibariro, ihira
ikibatsi?
Harya
ngo ni ubudasa (made in Rwanda) ra? Ni
byo koko buri tsinda ry'abantu rigira umwihariko waryo, kandi n'abo
babigeze
ntibabivukanye. Ariko se ibyo bivuze ko tugiye gukatira amapine
y'uruziga
[reinventing the wheel] ngo ni ukwihesha agaciro?
Ntukitiranye
amategeko y'abantu n'aya kimeza
(natural laws). Ay'abantu uzayahangare ndetse nawe wihangire ayawe;
nakubwira
iki! Ariko aya kimeza ntuzahirahire kuyirengagiza. Ntakuka. Icyo
abahanga
bakora, ni ugushakashakisha irindi tegeko kimeza bakabihuza. N'ubwo
irya kabiri
ridakuraho irya mbere, kubihuza havamo ka gashya nyako. Hakavuka indege
n'ibindi bigendajuru biganza rukuruzi y'isi, bisunitswe n'umwotsi
uturuka muri
moteri yabyo. Kandi ubwo ubonye kimwe mu byo ukwiye gusobanurira turya
twana
duhorana amatsiko, aho kubabindikiranya ngo nyabugenge n'ubugenge bwayo
cg ngo
ni amayobera matagatifu! Ngo hahirwa abemera batabonye!
Ubwose
wazatera imbere ute utekereza utyo Mana
yanjye? Kandi ubwo ngo turi nyambere mu burezi, dushishikariye
ikoranabuhanga,
dukangurira buri wese kwigira! Mbere yo gutekereza kwigira, banza
wemere ko uri
umuntu; nturi imashini dore ko na yo hari ibyo ikenera. Umuntu afite
amategeko
kimeza agomba gukurikiza kugira ngo abeho, kandi abeho neza.
Narumiwe
numvise ko na gitifu w'akagali (cell
leader) mu Rwanda ashobora guhamagara minisitiri. Hari n'umuntu woroheje rwose wampaye
nimero ambwira ko ari
iza Kagame bwite. Noherejeho mesaje (SMS), iranasubizwa inshuro zirenze
eshatu.
Gusa simpamya ko ari we ubwe twaganiriye.
Simvuze
ko perezida adakwiye gushyikirana na
buri wese ariko. Icyo nshaka gushimangira, ni impamvu imibereho
n'imikorere
y'abayobozi ikwiye kwitonderwa kugira ngo umutekano n'ubuzima bwabo
bibungabungwe. Ni gute umuntu yatekereza neza igihe aba bakurikira
bashobora
kumuhamagara igihe icyo ari cyo cyose kandi bakavugana icyo ari cyo
cyose?
•
Abanyarwanda
basanzwe nk'ibihumbi 5000;
•
Abayobozi
nk'ibihumbi 3000;
•
Abanyamahanga nka
500;
•
Abashinzwe
umutekano nka 300
•
Abakuru b'ibihugu
nka 200;
•
Abandi ntazi nka
500.
Watora
agatotsi ute koko uzi ko abantu 10,000 bashobora kuguhamagara iryo joro
kandi
wowe ahubwo ushobora guhamagara uwo ushatse kuri iyi si?
Ariko
ntugire ngo ibyo bigarukira ku bitotsi no kuruhuka gusa. Buri
wese mu bajijutse aba arota ngo perezida
yamugeneye akantu! Amakosa yabura ate igihe umuyobozi ashobora
gushyiraho umuntu
mu gitondo, akamuhindurira inshingano saa sita, yashaka nimugoroba
akamukuraho?
Nta muntu n'umwe ugira icyo amubaza!
Ibibazo
nk'ibyo ni byo byari bikwiye kwigwaho
mu nama y'umushyikirano. Aho kwirirwa tuvuga imivugo cg dutanga imibare
itekinitse tugaragaza uburyo Kigali igiye kuba nka Shikago (Chicago)
iteretse
muri Singapore (Singapour). Iyaba twari tubanje tugahashya
n'iyi malariya!
Mvuze
malariya binyibutsa ubundi bujiji
bwantangaje i Rwanda. Iyo umuntu avuye kwivuza akenshi uwo bahuye
amubaza niba
bayibonye cg bayibuze. Malariya. Nonese nta yindi ndwara iba yo ra?
Kandi
sinanabarenganya kuko n'ababavura usanga
ari yo myumvire. Ngo uyu munsi turi bake kuko abaganga babiri barwaye
malariya.
Uretse no kuba umuganga urwaye malariya atafasha abaturage kuyirwanya,
hari
n'ubwo usanga ari umunaniro gusa yitiranya na malariya; kandi ngo ni
umuganga--n'ubwo abenshi bitwa abaganga mu Rwanda ari abaforomo!
Iyo
uvuze ibyo kwirinda malariya cg ibindi,
bakuzimiriza muri ya migani yacyuye igihe ukamwara ari wowe.
Muvandimwe
rero, reka nongere ngushimire kuba
wakomeje kwihangana kugeza ubu. Iyaba twashoboraga kuvugana aka kanya,
nari
kukubaza icyo uri gutekereza. Ariko ndakeka uri kwibaza umwanzuro ku
byo
nagucishijemo byose.
Ni
wowe ubwawe ukwiye kwifatira umwanzuro. Gusa
kubeshya Abahinde burya bisobanura
kwibeshya!
Sinari
ngamije kugira uwo mbeshya cg ngo
mubeshyere. Ariko niba wumva hari aho nabikoze, umbabarire kwibeshya.
Ngusabye
imbabazi rwose. Ntutangire kumpigahiga. Jye nemera ko ubishatse wanca
ukuboko
cg umutwe mu izina ushaka (harimo n'irya Patiri na Mwana na Roho
Mutagatifu!).
Icyo waba ugezeho ni uguhemukira abana banjye nawe utiretse n'ubwo
utabizi.
Gusa jye mu bakwifuriza ikibi sindimo. Icyo nkwifuriza ni ukugaruka
ibuzima
nk'uko wari umeze mbere y'uko abazimu bakokama!
Ahubwo
ushobora kuba uri no kwibaza uwo ndi we
n'icyo ngamije.
Na
byo reka mbiguharire. Unshyire aho ushaka!
Gusa
nagukangurira gusoma izindi nyandiko
zanjye, harimo iyitwa "UGIZE
NGO IKI?" benshi bakuramo ibintu bifatika bibafasha
mu buzima busanzwe.
Gira
icyo ushaka.
Umunsi
cg ijoro ryiza.
NYIRAMIRUHO
Liberata