Urubanza rwa Ingabire na Kagame :
Ukuli ku Rwanda kulimo kujya ahagaragara

 

Mu rubanza rukomeje kubera mu rukiko rukuru rwa Kigali ago mu gihe kigera ku kwezi n'igice rumaze rutangiye, Ingabire aburana na Kagame uhagarariwe na Ruberwa Bonaventure, Mukuralinda Alain na Hitiyaremye Alphonse (abashinjabinyoma aribo bashinjabyaha) ndetse rugasifurwa n'umusifuzi mukuru (umucamanza) Ngendakuriyo Rulisa Alice yunganiwe n'abasifuzi bungirije Rutazana Angeline na Nzabonimana Celestin, ukuri ku buryo ruzacibwa kumaze kwigaragaza ariko n'ukuri kw'ingoma mpotozi ya Kagame nako kumaze kujya ahagaragara n'ubwo kugikomeza kwigaragaza uko bwije n'uko bukeye.

Mu ntangiriro z'iyi kinamico, abapolisi batangiye ku munsi wa mbere batesha agaciro abunganira Ingabire ku buryo babitangiye ikirego ariko umusifuzi mukuru Rulisa akabirenza amaso. Uwo munsi kandi umushinjabinyoma mukuru yavugiye mu kibuga (mu rukiko) ko ibyo abapolisi bakoreye abunganira Ingabire ntacyo bitwaye kuko bunganira umu terroriste bakaba aribyo bakwiye gukorerwa. Urubanza rwarakomeje abashinjabinyoma uko ari batatu bakomeza kwitakuma bavuga ibinyoma bapfundikanije iminsi irashira indi irataha, abantu bararambirwa ndetse n'umusifuzi mukuru atangira guhondobera kugeza n'aho afashe icyemezo ko umukino (iburanisha) uzajya uhagarara saa saba z'amanywa.

Umukino umaze ibyumweru bitatu abashinjabinyoma bigereza umupira bakajya mu izamu rimwe bakagaruka mu rindi, bamaze kwisararanga bihagije nibwo umusifuzi akora gusa umurimo wo gusifura ko isaha yo guhagarika umukino igeze nibwo Ingabire yahawe igihe cyo kwiregura maze abamwunganira bageza ku musifuzi iyandiko igizwe n'impapuro zigera ku 10 zikubiyemo impungenge zijyanye n'ibyo ubushinjabinyoma butubahirije ndetse n'amategeko atarakurikijwe maze umusifuzi mukuru Rulisa umujinya uramurenga atuka abunganira Ingabire ngo bakora nk'aba barbares! Nimunyumvire namwe ngo umuntu uzararama agaca urubanza imyifatire ye uwiregura ataranatangira kugira icyo avuga!

Ntibyatinze abashinjabinyoma bamaze kumvikana n'umusifuzi mukuru n'abamwungirije urubanza bararusubika mu gihe kingana n'iminsi munani kugirango bajye kwiga ku bindi byemezo bagomba gufata. Bwarakeye bagaruka umusifuzi atangaza ko urubanza rukomeza ko ngo inzitizi n'impungenge z'abunganira Ingabire ndetse na we ubwe nta shingiro zifite. Nguko uko umusifuzi azararama ngo agaca urubanza rutabera! Abantu bose n'ubwo bari batashye bumva neza ibyo Ingabire n'abamwunganira basabaga ariko bari banazi neza ko batazabihabwa kabone n'ubwo byumvikanaga neza ko amategeko hahonyowe kandi niko byagenze umusifuzi afata icyemezo cyo kudahindura umukino ndetse agakomeza akanawusifura.

Mu gihe rero Ingabire atangiye kwiregura uyu musifuzi Rulisa ntiyigeze amworohera na busa. Igihe yamaze acecetse abashinjabinyoma bisararanga ndetse na we ubwe agatura ibishyito aho gukurikira umukino byaje guhinduka maze si ukwibasira Ingabire avayo! Nta mwanya nyakuri Ingabire yigeze agira wo kwisobanura n'ubwo umusifuzi yari yaremereye mu ruhame ko ariko bizagenda ariko byaranze biramunanira maze aho kureka Ingabire ngo yisobanure ku byo yarezwe ahubwo akamuhata ibibazo bitanafite n'aho bihuriye n'ibyo bamureze. Iyo Ingabire amaze kungikanya ibitekerezo bikubiyemo ubwiregure bwe ndetse bunashingiye no ku bimenyetso bifatika byambika ubusa FPR n'umuyobozi wayo mukuru, umusifuzi Rulisa ahita abicamo maze akajya mu bibazo bidahuye n'ibyo uregwa avuga ndetse bitanajyanye n'ibyo yarezwe.

Aha rero niho urubanza (nako ikinamico) rugeze ariko bikaba bigaragara ko nta butabera na busa buzarubonekamo nyamara bikaba binagaragara ko ruzarangira FRR na Kagame bagiye ku karubanda kuko uko biboneka Ingabire ariregura atanga ibimenyetso bifatika bigaragaza ko ibyo yavuze bo bita ingengabitekerezo no kwangisha abaturage ubutegetsi bishingiye ku bikorwa bakoze haba mu Rwanda no muri Repubulika Iharanira Demokarasi ya Kongo kuko mu bimenyetso yifashisha harimo na za raporo zitandukanye zakozwe n'inzobere za Loni n'ubwo muri uru rubanza umusifuzi Rulisa asobanura ko bataburana na Loni ahubwo baburana na Ingabire. Yirengagiza ariko ko ibyo bamureze bishingiye ku byo yagiye avuga n'ibyo yagiye yandika bityo na we akaba agomba kwiregura yerekana ko ibyo yavuze n'ibyo yanditse bifite aho byaturutse ndetse ko n'inzobere zabikozeho ubushakashatsi mu gihe byabagaho (igihe byarimo kuba) zemeje ko byabaye bikagaragarira muri izi raporo zagiye zikorwa.

Igituma rero uru rubanza rutazacibwa nta marangautima ni uko ibyo umusifuzi Rulisa yemereye mu rukiko mu ntangiriro byamunaniye kubyubahiriza we ubwe bikaba biboneka ko no kurarama atazabishobora. Kuzakora ibijyanye n'amarangamutima ye cg ibyo yatumwe nicyo kigaragara muri uru rubanza ariko kuba ruzasiga rwambitse ubusa Kagame na FPR nabyo biragaragarira buri wese!