Perezida Kagame yahinduye bamwe mu bayobozi bakuru bo mu ngabo:

Mw’itangazo rimaze gushyirwa hanze na ministeri y’ingabo riravuga ko perezida yahinduye bamwe mu bayobozi bakuru bo mu ngabo:

http://www.igihe.com/amakuru/u-rwanda/article/impinduka-zitunguranye-mu-buyobozi-bwo-hejuru-mu-gisirikari-cy-u-rwanda

Gen Charles Karamba: umugaba mushya w’ingabo zirwanira mu kirere, niwe wayoboraga ishuri rya gisirikari rya Nyakinama, akaba ari nawe wari maneko wa za ngabo za FPR zari muri CND mu 1994.

Maj Gen Richard Rutatina: umuyobozi mushya wa J2 (DMI). Yongeye guhabwa uyu mwanya nyuma y’igihe kinini ari ku gatebe. « DR Poison » nkuko akunze kwitwa ubu agiye kubura intwaro ye kirimbuzi y’« UTUZI TWA DAN MUNYUZA ».

Brig Gen Innocent Kabandana: umuyobozi w’ingabo zidasanzwe (Special Forces). Kabandana yashimiwe kuba yararinze neza abana ba Kagame igihe bari mu mashuri muri Amerika. Yasimbuye kuri uyu mwanya Gen Vincent Gatama, urya warwanaga muri Congo mw’izina rya M23, nyuma ikaza kuyoberwa ikiyikubise!

Maj Gen Jean Bosco Kazura: umuyobozi w’ishuri rya Gisirikari rya Nyakinama. Yari asanzwe ayobora irya Gako

Brig Gen Demali na Lt Col Franco Rutagengwa bo bagizwe abayobozi mu biro by’Umugaba Mukuru w’Ingabo z’u Rwanda. Bivuga ko bashyizwe ku gatebe. Gen Demali yari inshuti magara ya Jack Nziza naho Lt Col Franco Rutagengwa wayoboraga DMI yitwaga umuhungu wa Jack Nziza (Fils adoptif). Col Nyakarundi we yagizwe umuyobozi ushinzwe inyungu za gisirikari z’u Rwanda i Washington. Uyu Nyakarundi nyuma y’imyaka ine yose ari ku gatebe yari yarashyizweho na Jack Nziza, niwe ugiye gusimbura Gen Kabandana mu kurinda abana ba Kagame muri Amerika.

Gen Jack Nziza na Gen Demali bari inshuti magara. No muri siporo ntibasigana. Aha bari i Gabiro mu mwiherero.

Ni ngombwa kumenya ko igihe Col Nyakarundi yavanwaga muri Amerika, umugore n’abana be basigayeyo, maze umugore we asaba ubuhungiro abeshye leta ya Amerika ko leta ya FPR imuhiga imuziza ko ari umurwanashyaka wa RNC. None ubu umugabo we arongeye aragabiwe, ejobundi muzababona bari gucinya umudiho muri Rwanda day.

Uwitwa Majoro Bazatoha we akaba yazamuwe mu ntera agirwa Lieutenant Colonnel ahita yoherezwa i New York (ONU) guhagararira inyungu z’u Rwanda mu bya gisirikari.

Aya mahinduka aratubwira iki? Kuki Gen Innocent Kabandana ari we wagizwe umukuru wa Special forces?

Uwahoze ari ingabo mu ngabo za Amerika Bwana Jean Paul Rugero Romeo; arasanga impamvu bagize Brg Gen Kabandana Innocent, wari umaze imyaka myinshi ari Military Attaché muri Leta Zunze ubumwe za Amerika, byaba ari ukubera ko amaze iminsi mu myiteguro n’ impuguke z’ abanyamerika mu bikorwa by’ intamabara idasanzwe (Unconventional Warfare) , ariko kazi k’ ibanze k’ Ingabo za Special Forces nyazo.

Gen Innocent Kabandana yagizwe umugaba wa « special forces »

-       Harimo gukora imitwe irwanya ubutegetsi mu bihugu bitavuga rumwe n’u Rwanda. Kuba Uyu Gen Kabandana yari amaze imyaka hafi Icumi ari muri Amerika, atabona urugamba mu karere, akaba ahawe uyu mwanya, nuko Rwandan Special Forces imaze iminsi nta « Success » haba muri Congo, Burundi, cyangwa Tanzania.

-       Iri vugururwa mu butegetsi bwa Special Forces, bikaba bivuga n’ ihinduka muri Strategy y’ uko zari zisanzwe zikora. Twakwitegura kubona, imitwe mishya irwanya ubutegetsi mu Burundi na Tanzaniya, ndetse no muri Congo.

-       Twakwitegure kubona ibikorwa by’ iterabwoba bidasanzwe, bigamije gutera urujijo mu bihugu bituriye u Rwanda. 

-       Ikorana rya Empire Hima Tutsi na ba mpatsibihugu b’ abanyamerika rirakomeje, ariko mu isura y’ ibanga rikomeye. 

Ariko igikorwa nk’iki nubwo ari icyo kwitondera, ni icyerekana ko mu ngabo z’ u Rwanda cyane cyane ziriya bahaye izina rya “Special Forces” harimo ibibazo by’ ubumenyi, n’ ubushobozi babeshya ko bafite, ariko bwananiranye. Kuva M23 yatsindwa, mu Burundi ntibigende neza, mission y’ izo ngabo yataye umurongo. None Kigali ikaba inateganya gufasha akaduruvayo muri Tanzaniya, bizwi ko nayo ifite ingabo ziteye neza.

Ariko Intambara idasanzwe (Unconventional Warfare) si amasasu gusa. Ingabo za “Special Forces » intambara zazo nyinshi ziraba zikazarangira zitagaragaye. AHUBWO ABO ZIKORERA INYUMA ARIBO TUBONA!!Twakwibutsa abasomyi b’IKAZE IWACU ko Gen Innocent Kabandana ari we wivuganye abasenyeri ba kiliziya gatolika i Gakurazo mu cyahoze ari Gitarama. None nguyu nanone ahawe umwanya wo kuyobora ingabo zo gukora iterabwoba mu karere. 

Uwimana Joseph

Ikazeiwacu.fr