Amakuru Adasanzwe:Padiri Aloys Murwanashyaka muri mabuso

Byanditswe Tariki ya: 27, Gicurasi, 2008 - 07:15:11   (-0400 GMT)

Inkuru ya: Buhigiro

Amakuru ashyushye hano i Kigali ni ifatwa n'ifungwa rya padiri Aloys Murwanashyaka wo muri Diyosezi ya Kibungo.

uwo mupadiri uzwi ho kuba ari umwihanduzacumu mu butegetsi bwa Kagame, araregwa ibintu bikomeye birimo: kuba afite ingabitekerezo ya génocide, kuba ari ingambanyi y'igihugu ngo kuko akorana n'abaspanyoli banditse za mandats. Kuba apfobya itsemba bwoko no kuvangura abanyarwanda agendeye ku moko. Umuntu nk'uwo mwese murumva urumukwiye.
Ababikurikiranira hafi ariko bo bemeza ko icyo Padiri Aloys azira ari uko ari umwe mu banyarwanda b'injijuke wemeye kuguma mu Rwanda nyuma y'aho imiryango yabo imariwe n'inkotanyi. Ni umuhanya rero bagoma kwikiza..

Ibyo kandi kubihisha nk'abandi benshi byaramunaniye ku buryo iyo ukwezi ko kwibuka kugeze, ngo yagiraga umunsi ajya gusoma missa yo kwibuka abe yashyinguye mu cyubahiro bose babibona. Ngo haba hari mugenzi we w'umupadiri wamugiriye inama yo kutabikora agira ati "sha rwose ko n'abasenyeri batibuka ababo baguye i Gakurazo wowe ibi wabiretse?" Ngo yaramushubije ati "abasenyeri icyo bapfana ni intebe bicayeho. Jye abo nibuka ni ababyeyi, abavandimwe, umuryango wanjye wose watigishijwe na bamwe mu nkotanyi. Nta muntu n'umwe ushobora kumbuza uburenganzira bwo kwibuka abanjye".

Mugenzi we yaramubwiye ati wa mwana we uzikoraho. Hari n'abandi bemeza ko mu ifungwa rye haba harimo bene wabo b'abapadiri batishimira kumubona muri bo mu gihe bose baboneye hamwe ibyo inkotanyi zakoze i Byumba na Kibungo ariko akaba ari we wenyine gitutsi muri bo. ( Niwe wenyine ushobora kubyemeza). Ibi byo ariko kugeza ubu nta gihamya bifite uretse ko na byo bitabura. Abamuzi turamusabira, turasaba kandi ko mu Rwanda havuka ba padiri Aloys Murwanashyaka benshi. Babandi bahitamo kuryamira ubugi bw'intorezo aho kuryamira ukuri. Imana imukomeze.

Source:Iwacu1.com