Kenya: Sentare Ntahinyuzwa yasavye ko amatora asubirwamwo

BBC Gaguza

Uhuru Kenyatta niwe yari yatangajwe ko yatsinze amatora n'akanama kajejwe amatora IEBC

Sentare Ntahinyuzwa ya Kenya yavuze ko amatora y'umukuru w'igihugu aheruka yafuswe, ko ari impfagusa mu kuba yakozwe hatisunzwe ibwirizwa shingiro.

Ivuga ko hari amakosa menshi yakozwe atuma amatora y'umukuru w'igihugu atawoyizera.

Uwurongoye igisata c'ubutungane (Chief Justice), David Maraga, yavuze ko akanama kajejwe amatora katashoboye gutunganya amatora kisunze amategeko ya Kenya.

Imigambwe itavuga rumewe n'ubutegetsi irongowe na Raila Odinga mu runani NASA yagumye iyiyamiriza, ivuga ko yaranzwemwo ubusuma.

• Odinga ariyamiriza ivyavuye mu matora ya prezida muri Kenya

Abacamanza bane kuri batandatu bavuze ko ayo matora ari impfagusa, ko Kenya itegerezwa gutunganya ayandi mu kiringo c'iminsi 60.

Abacamanza indwi ba sentare ntahinyuzwa ya Kenya ni bo bashinze ko amatora ategerezwa gusubirwamwo / AFP/Getty

Umukuru w'urunani NASA rwiyamirije ivyatangajwe ko vyavuye mu matora, Raila Odinga, yavuze ko abagize akanama kajejwe amatora bakoze amabi agayitse, ko bahemukiye abanyagihugu ba Kenya, ko bakwiye gupfungwa.

Ako kanama kari katangaje ko Uhuru Kenyatta, w'urunani Jubilee, ariwe yatsinze arushije Raila amajwi umuliyoni 1.4.

Prezida Kenyatta asaba abanyagihugu kubumbatira amahoro

Uhuru Kenyatta niwe yavuze ko yemeye ingingo ya Sentare, ariko ngo ntiyemeye ukwo yaciye urubanza

Umukuru w'igihugu ca Kenya, Uhuru Kenyatta, yasavye abanyagihugu kubumbatira amahora inyuma yaho Sentare Ntahinyuzwa imenyeshereje ko ivyavuye mu matora bibgizwe impfagusa, igasaba ko hatunganywa amatora mashasha.

Ashikiriza ijambo abanyagihugu, Prezida Uhuru Kenyatta yagize ati: "Umubanyi n'agume ari umubanyi, utaravye ivyiyumviro vyiwe vya politike, idini canke ingene asa".

Yavuze ko atemera ingene urubanza rwaciwe, ariko avuga ko yemeye ingingo Sentare Ntahinyuzwa yafashe.

"Abo bantu batandatu, bafashe ingingo ko baja kubiri n'aho abanyagihugu bishiriye. Abakenya batoye abashingamateka benshi ba Jubilee, abakenguzamateka benshi ba Jubilee, abagore benshi ba Jubilee mu baserukira abandi, abajenama benshi ba Jubilee," niko yavuze.

"Turiteguye gusubira mu banyagihugu, dufise imigambi nkiyo twabashikirije, iyo kunywanisha abanyagihugu, gushinga umugambwe w'igihugu, guteza imbere igihugu.

"Nta ngwano turimwo na bagenzibacu tutavuga rumwe.

"Abantu bari ku rushi, abantu batandatu, ntibashobora guhindura ivyipfuzo vy'abakenya imiliyoni 40. Abakenya nibo bazihitiramwo, ni nakwo demokrasi imeze."

Kenya: Chebukati yavuze ko abatovye amatora bazokurikiranwa

Umukuru w'akanama kajejwe amatora muri Kenya Wafula Chebukati

Umukuru w'akanama kajejwe amatora muri Kenya IEBC, Wafula Chebukati, yavuze ko abantu bose batovye amatora bakwiye kubibazwa.

Yavuze ko abakozi ba IEBC bagenywe gukurikirana amatora, basanze hari abandi bakibandanya imirimo batigeze bahindugwa.

Bwana Chebukati avuga ko "akanama kazotegerezwa guhindura bamwe mu bakozi" hageze gutunganya ayandi matora.

Yasavye ubushikirizamanza bwa Kenya gukora itohoza, ngo bushikirize ubutungane abo bose batovye amatora.

Yongeye asaba Sentare Ntahinyuzwa gutanga vuba icegeranyo ca nyuma c'icatumye ifata iyo ngingo, ngo akanama gashobore kwitegurira gusubirishamwo amatora.